Translate

Wednesday, June 28, 2017

Erdhi në Shkup ndërmjetësi evropian që u shpall i padëshirueshëm nga VMRO-DPMNE, ja misioni i ri

Ish ndërmjetësi belg në kohën e negociatave për Marrëveshjen e Përzhinës Piter Vanhojte është kthyer në Maqedoni për të ndihmuar procesin e reformave në media. Vanhojte në një prononcim për Alsat njoftoi se në tavolinë janë propozimet e Përzhinës, të cilat përveç VMRO-DPMNE-së, i kishin pranuar të tre partitë tjera.
Unë jam këtu me ftesë të Shoqatës së Gazetarëve për të mbështetur pak zhvillimin e propozimeve për reformat në media të cilat janë shumë të nevojshme, për të mbështetur aktivitetet lobuese ndaj Qeverisë dhe institucioneve përkatëse për t’i futur ato në rrugën e duhur. Mund të ketë disa çështje shtesë por në thelb janë propozimet e njëjta që kanë qenë tashmë në tavolinë, të cilat u pranuan nga tre prej katër partive gjatë asaj kohe – deklaroi Piter Vanhojte, ish ndërmjetësi belg.
Por, reformat sipas Vanhojtes, nuk do të ndodhin brenda natës. Rezultatet e para ai i pret brenda dy viteve.
Gjërat nuk do të ndodhin brenda natës. Brenda dy viteve, shpresoj, do ta shohim ndryshimin duke e krahasuar me këtë ku jemi sot por lutem që t’i jepet Qeverisë koha e nevojshme për të vepruar. Kjo është një gjë. E dyta, është një situatë shumë e vështirë, me shumë sfida si sistemi i shëndetësisë, sistemi i arsimit, sistemi i shërbimeve civile, ligji i mediave po ashtu. Tek e fundit, ligji i mediave është një pjesë e vogël e saj – tha Piter Vanhojte, ish ndërmjetësi belg.
Vanhojte shpreson se opozita nuk do ta pengojë procesin e reformave.
Shpresoj se ata do të sillen në mënyrë konstruktive dhe që do ta mbështesin procesin e reformave dhe jo ta pengojnë dhe ta vonojnë siç ka ndodhur shpesh më herët kur nuk ishin opozitë. Po le t’u japim kohë që të mësohen me pozitën e tyre të re. Ata kanë po ashtu shumë njerëz kompetent dhe mund të kontribuojnë shumë në procesin e filluar të reformave – u shpreh Piter Vanhojte, ish ndërmjetësi belg.
Marrëdhëniet me fqinjët, sipas ekspertit Piter Vanhojte, janë shumë të rëndësishme për një demokraci të qëndrueshme në të ardhmen./Alsat-M

0 comments :

Post a Comment