Translate

Thursday, May 11, 2017

6 kongresmenë amerikanë vizitë blic në Tiranë, ja prapaskenat e misionit

Kriza politike dhe bllokimi i reformës në drejtësi ka bërë që SHBA-BE të kthejnë sytë nga Shqipëria. Ditën e djeshme kanë zhvilluar një vizitë të papritur në Tiranë një grup senatorësh amerikanë, të cilët kanë pasur takime me krerët e politikës shqiptare. Vizita e tyre ishte e papritur dhe qëllimi ka qenë mister. Kanë qenë 6 senatorë, me në krye shefin e Komitetit mbi Çështjet e Drejtësisë, Bob Goodlatte. Takimet nisën që herët në mëngjes me Presidentin Bujar Nishani, kreun e Kuvendit ,Ilir Meta, ministrin e Jashtëm Ditmir Bushati, apo dhe me kreun e opozitës, Lulzim Basha. Por përveç aktualitetit politik, sipas informacioneve, dy kanë qenë kryetemat e misionit të tyre: monitorimi i punës së ambasadës së SHBA dhe ambasadorit Donald Lu, i cili është i emëruar nga Barack Obama, si dhe zbatimi i reformës në drejtësi. Ka qenë portali “The American Spectator”, ai i cili që në datën 8 maj e paralajmëroi vizitën e kongresmenëve në Tiranë. Sipas portalit, gjatë kësaj jave Kongresi Amerikan është pushim dhe ata kanë vendosur të marrin një tur ballkanik, me qëllim për të parë nga afër situatën dhe mbikëqyrjen e ambasadave të tyre, sidomos mbi ndikimin e Soros. Ata do zhvillojnë takime në Itali, Greqi, Maqedoni, Kosovë dhe Bosnje. Edhe vizita në Tiranë ka pasur si synim për të parë nga afër punën e ambasadorit Lu, i cili është akuzuar shumë kohët e fundit. Po ashtu, kongresmenët kanë si qëllim të vizitës së tyre të shohin ndikimin që ka George Soros në Shqipëri e Ballkan. Në përfundim të misionit të tyre, ata do hartojnë nga një raport dhe do i paraqitet Kongresit, ku në rast se shihet se ka nevojë për ndërhyrje apo rrokadë në ambasada, do kërkohet një gjë e tillë.
Takimi me Nishanin
Kongresmenët i nisën takimet me Presidentin Bujar Nishani, ku mësohet se fokusi i është vënë reformës në drejtësi. Ata kanë kërkuar që të zbatohet me urgjencë vetingu dhe gjithë reforma. “Presidenti Nishani dhe kongresmenët amerikanë diskutuan dhe ndanë mendime e pikëpamje mbi çështje të ndryshme si: situata politike në Shqipëri, zgjedhjet e ardhshme parlamentare, ecuria e reformës në drejtësi, rëndësia e shtetit ligjor, shqetësimi për dukurinë e kanabisit dhe trafikut të drogës, krimit të organizuar si dhe rreth buxhetit financiar për shpenzime ushtarake dhe mbrojtjen, duke pasur parasysh që Shqipëria është vend anëtar i NATO-s dhe aleat besnik e i ngushtë i Shteteve të Bashkuara të Amerikës”, njoftoi Presidenca.
Takimi me Metën
6 anëtarët e Kongresit Amerikan patën një takim dhe me kreun e Kuvendit Ilir Meta, ku dhe aty fokus ishte reforma në drejtësi, por dhe aktualiteti politik. “Gjatë takimit u diskutua mbi zhvillimet e fundit politike në vend me fokus të veçantë në mbarëvajtjen e zgjedhjeve të ardhshme të përgjithshme, avancimin e reformës zgjedhore, zbatimin e reformës në sistemin e drejtësisë, rritjen e buxhetit në fushën e mbrojtjes në kuadër të NATO-s dhe forcimin e sundimit të ligjit dhe kredencialeve demokratike të Shqipërisë. Dy palët diskutuan gjithashtu edhe mbi forcimin e luftës kundër korrupsionit dhe krimit të organizuar, ku vëmendje e veçantë iu kushtua fenomenit të trafiqeve të paligjshme të lëndëve narkotike dhe kultivimit masiv të drogës në vend si një aktivitet që lidhet edhe me rrezikun e terrorizmit dhe krimit të organizuar në të gjithë rajonin”, njoftoi Kuvendi.

0 comments :

Post a Comment