Translate

Tuesday, January 31, 2017

Nderi i fundit i BDI-së për VMRO-në!

Reçica vuri në skenë me mjaft sukses mbrëmë, pjesën e parë e shfaqes teatrale me kukulla. Një shfaqe që e mbajti në ankth publikun për dy netë rresht, me skena që do i kishte zili edhe regjisori më i mirë i Hollivudit.
Publiku ishte në ethe gjatë dy netëve sa zgjati shfaqja, publiku vendas në ekstazë priste epilogun. Por ethet e brendëshme që me aq mjeshtëri i ofroi shfaqja në Reçicë, patën efekte anësore tek disa media dhe politikanë në Shqipëri, të cilët filluan urimet e pakuptimta për suksesin e një shfaqeje që edhe sot është larg përfundimit.
Përkundër dritave me ngjyra që integristët u munduan me mjeshtëri t’i vënë sipër skenës së tyre gri, çfarë në të vërtetë ndodhi mbrëmë në Reçicë? A u kuptua mesazhi i vërtetë i shfaqes? Kë duhet të analizojmë, kukullat e BDI-së, apo atë që tërheq litarët e këtyre kukullave, VMRO-në. Po ti analizojmë kukullat, nuk mund të mos vijmë në përfundimin se performanca e tyre, si rrallë herë, ka qenë e shkëlqyer.
Kukullat luajtën me përpikmëri të gjitha rolet e caktuara nga regjisori VMRO, madje në mizanskena të ndryshme, e habitën edhe regjisorin me “vërtetësinë” artistike në lojën e personazheve. Ata arritën në dy ditë të japin megashfaqen më të madhe që bota ka parë ndonjëherë.
Humbjen arritën ta paraqesin si fitore, të vërtetën ta mbulojnë në tymin e lajthitjeve informative, që vetë ata i plasuan e më pas i mohuan, dhe në mesnatë, papritmas, u vetëparaqitën si “shpëtimtarët” e shqiptarëve të Maqedonisë, duke realizuar kërkesën dhe dëshirën më të madhe të VMRO-së, të shuajnë në heshtje Prokurorinë Speciale, pa pasur fare nevojë për një fajtor ku ndërkombëtarët dhe opinion vendas do të drejtonte gishtin. Po, po.
I vetmi vendim i mbrëmshëm i BDI-së, por që asnjëri prej tyre nuk doli ta thotë, është shuarja e PSP-së, së cilës aq shumë i trembet VMRO dhe vazali i saj, BDI. Partnerët tmerrohen nga funksionimi normal i PSP-së, pasi qëllimi kryesor i kësaj prokurorie është dekriminalizimi i skenës politike në Maqedoni. Për VMRO-në dhe BDI-në, vazhdimi i mandatit të Prokurorisë Speciale, do të thotë burg për udhëheqësitë dhe funksionarët e kësaj partie. Mjaftojnë vetëm bombat e dëgjuara të funksionarëve të BDI-së të tipit “Hudhja”, “Kputja”, “Futja”, “A e kan inçizu tu mbush kutija?”, apo pazari për objektin pērballë ambasadës amerikane, vetëm këto mjaftojnë që për udhëheqësinë e BDI-së, të sigurojnë minimum 10 vite burg. 10 vite burg nga bombat që i dëgjoi gjithë publiku, po sa mund të marrin nga bombat që ende nuk i kemi dëgjuar, por që i ka dhe do t’I përdorë në hetimet e radhës Prokuroria Speciale. Dhe sipas informatave tona, janë mbi 90% “bomba “ të padëgjuara. Atëhere 10 vitet bëhet 100 vite burg.
Vetëm me lëndët e hapura aktualisht për VMRO-në nga PSP, vetëm me akuzat aktuale kundër zyrtarëve të VMRO-së, janë të garantuara vite me bollëk nëpër qelitë e burgjeve të vendit. Kjo e tmerron VMRO-në, e cila frikën e manifeston me të drejtë haptazi, sepse tashmë po e ndjen mbi kurriz rrezikun e burgosjes pas aktpadive të shumta të ngritura kundër tyre.
BDI frikën e manifeston si çdo herë, fshehurazi. Ditën sillen normalisht madje deklarativisht përkrahin punën e PSP-së, ndërsa natën nuk ka gjumë, mendojnë vetëm nëse dita që do të zbardhë nesër, do të jetë dita kur PSP do të mbajë pres konferencën e radhës, ku të akuzuarit kryesorë do të jenë pikërisht ata. Luten që kjo ditë të mos vijë, por frika që demonstrohet lirisht vetëm natën kur mblidhen kokë më kokë për të gjetur zgjidhje, i ka bërë aktorë të shkëlqyer gjatë ditës.
Për ta hequr qafe “rrezikun“ PSP, zgjodhën një shfaqe me dy akte, e vetmja mundësi që do t’i nxirrte edhe VMRO-në edhe BDI-në, të dalin të larë para bashkësisë ndërkombëtare dhe opinionit vendas. Deri tani zgjedhjet ishin arsyetim për shumë gjëra në vend. Por zgjedhjet mbaruan dhe tani VMRO e ideoi dhe BDI realizoi variantin e ri të lojës, shpikën temat e reja, ndezën mosmarrëveshjet mes tyre, madje si shkak për këto mosmarrëveshje, bënë gjuhën shqipe. Njëri nuk e do, tjetri e “mbron “ me çdo kusht.
Pikërisht atë gjuhë për të cilën, i pari thoshte se shqiptarëve ju kanë dhënë maksimumin në ligjin për përdorimin e gjuhëve dhe dyti na mbushte mendjen se e kanë zyrtarizuar dhe e kanë bërë pjesë të Kushtetutës. Aq shumë e “komplikuan” situatën, sa tani si të vetmen zgjidhje të kësaj krize të sajuar, po nxjerrin zgjedhjet e parakohëshme parlamentare.
Po pse zgjodhën zgjedhjet e parakohëshme parlamentare? Sepse mbajtja e një palë zgjedhjesh të reja, vërtetë ka rrezikun potencial të mos i nxjerrë fitues as BDI-së e as VMRO-në, por zgjedhjet janë zgjidhje e frikës së tyre më të madhe, Prokurorisë Speciale. Zgjedhjet i shpëtojnë funksionarët e VMRO-së dhe BDI-së, nga burgu i pashmangshëm, nëse PSP vazhdon të funksionojë. Sipas VMRO-BDI-së, mandati i PSP-së, përfundon në prill. Vetë PSP vlerëson se nëse nuk bëhen ndryshimet e kërkuara ligjore, afati aktual duhet t’i përfundojë në muajin korrik.
Nëse vendi shkon edhe një herë në zgjedhje të parakohëshme parlamentare, ato duhej të mbaheshin me zgjedhjet lokale, raundi i parë i të cilave sipas Kodit Zgjedhor, duhet të mbahet në pjesën e parë të muajit maj. Prej datës së mbajtjes së zgjedhjeve, e deri në formimin e qeverisë, afatet ligjore mundësojnë zvarritje mbi 60 ditë, kohë e mjaftueshme kjo që PSP të shuhet, qoftë në prill qoftë në korrik.
Por derisa të bëhet e qartë se kjo shuarje në heshtje e PSP-së, është i vetmi qëllim i lojës së “urrejtjes” mes VMRO-së dhe BDI-së që dëgjuat këtyre javëve të fundit, do të vazhdojmë të shohim drama të shkurtra të tipit se cili hajn është partioti më i madh për popullin e vet, Gruevski te maqedonasit apo Alia tek shqiptarët.
Ky është qëllimi i VMRO-së dhe BDI-së. Të jeni të sigurtë se e gjithë kjo lojë, është pjesë e marrëveshjes së përbashkët që tashmë është arritur. Është marrëveshje në dëm të qytetarëve dhe në interes të hajnisë së tyre. Është marrëveshje që po kalohet heshturazi, nën trumbetimin se shqiptarët e çuan në histori Nikolla Gruevskin.
Shuarja e PSP-së është marëveshje më e rrezikshme se ajo për rastin e Kumanovës, edhe se marrëveshja për “Ligjin e Branitellave”, regjistrimin e popullsisë, incidentin në Kalanë e Shkupit e deri tek “Monstra” dhe Marrëveshjet e përditshme antishqiptare dhe anti qytetare. BDI mbrëmë tha se nuk ka marrëveshje , në fakt për dy ditë me radhë, në supermaratonën në Reçicë, u vulos marrëveshja më e rëndësishme me VMRO-në. Ajo që do t’i shpëtojë kryekriminelët./Ditari.mk/

0 comments :

Post a Comment