Translate

Tuesday, July 12, 2016

Opinion: Mualifet e Mulla Sulës kontravers

Mulla Sula nuk paska besuar se një ditë Maqdonia do të vie në këtë derexhe ku gjendet sot! Po kush e solli? Natyrisht, lutja e tij që “Allahu i Madhërishëm ta bekojë Gruevskin” dhe, sjellja prej një lakei të fëlliqur para politik(u)ajve të BDI-së, vazalë të “liderit të bekuar”

Shkruan: Haxhi Isa Xhaviti

Nuk kanë të sosur mualifet e Mulla Sulës kontravers. Në fakt, Afrim ef. Tahiri me të drejtë thotë në megaintervistën e fundit se, sa herë t’i jepet mikrofoni Mulla Sulës, ai gabon, që do të thotë se sa herë që e hap gojën ia fut kot!
Në bisedën e fundit që me të e zhvilloi Radio Evropa e Lirë, ai lëshon “ca margaritarë” të cilat në fakt dëshmojnë për një njeri tepër të pafytyrë. Të gjithë i njohin kapacitetet e ulta intelektuale të Mulla Sulës por, nga ana tjetër, edhe të gjithë e dinë se REL-i, si sërë mediash ndërkombëtare, gjithnjë ia mbajnë anën opozitës, ndaj dhe u japin hapësirë komuniteteve të ndryshme si dhe shoqërisë civile, luftëtare këto të denja të pushtetit të dyshimtë demokratik, gjithandej nëpër botë.
Mulla Sula, në këtë bashkëbisedim, veç të tjerash do të deklarojë se “Maqedonia për momentin është në një krizë të thellë politike dhe kjo krizë e thellë politike nuk është e rastësishme. Sigurisht se është rrjedhojë e mosveprimit të shtetit juridik. Veprimi i shtetit ka qenë dhe është me dy kute të ndryshme. Përdoren standarde të dyfishta në mes bashkësive të ndryshme fetare dhe etnike në Maqedoni”, thotë Mulla Sula, duke shpehur edhe këtë habi “Nuk kam besuar se që prej pavarësimit Maqedonia mund të vijë në një gjendje kaq të rëndë”.
Po kush e solli në këtë gjendje kaq të rëndë këtë shtet, veçanërisht shoqërinë shqiptare në këtë shtet? E sollën pikërisht dy aleatët dhe bashkëpunëtorët më të ngushtë të Sulejman Rexhepit. Sikur të mos ishte hipokrit ai do të pranonte se, kjo gjendje është pasojë e keqqeverisjes së VMRO-BDI-së, dy partitë që e mbajnë me frymëmarrje artificiale (gojë-gojë) Mulla Sulën.
Edhe Radio Evropa e Lirë por edhe mbarë opinioni i gjërë i vendit e di fare mirë që, sikur Mulla Sula veç paaaak të mos ishte i korruptuar moti do të përfundonte epoka e Gruevskit dhe e Ali Ahmetit, sepse, keqtrajtimet dhe disriminimet fetare tejkalohen vetëm me lëvizje aktive dhe jo me rënie klloçkë siç ka rënë Mulla Sula.
Fundja, ky pushtet, njëra faqe e liderit të këtij pushteti (Nikolla Gruevski) e ka sjellë në këtë derexhe shtetin e Maqedonisë falë pikërisht bekimit të Mulla Sulës që ia bën “E lus Allahun e Madhërishëm që ta bekojë Nikolla Gruevskin...”, dhe, faqa tjetër e liderit të këtij pushteti (Ali Ahmeti) e ka sjellë në këtë derexhe shtetin pikërisht falë bashkëpunimit destruktiv që e ka me Sulejman Rexhepin, me të cilin janë konstruktiv vetëm në tavolinën e shtruar plot me mish e me sexi sallata.
Nikolla Gruevski e gëzon edhe më tej uratën e Sulejman Rexhepit kurse Ali Ahmeti e gëzon përkrahjen e parezervë të Sulejman Rexhepit. Që të dy ia kanë mundësuar Mulla Sulës një fushëveprim të pakontrolluar ku ai ndjehet mu si në bahçe të babës së vet.

Mulla Sula, si “lider fetar”, me asnjë levizje aktive nuk ua turbulloi për asnjë sekond ujin as Gruevskit e as Ahmetit, prandaj, për këtë situatë të mjerueshme ku ka katandisur Maqedonia dhe shoqëria shqiptare bashkëfajtor është edhe Mulla Sula. Mos të merret me mualife por le të gjejë mënyra dhe le ta tërheqë bekimin, ose le ta shprehë një herë mallkimin mbi Gruevskin dhe Aliun. Punët e këqia, të gjithë punët e këqia, çdo herë i janë realizuar Mulla Sulës. Le t’i mallkojë njëherë dyshen e keqe për Maqedoninë dhe shqiptarët e Maqedonisë dhe, bashkë me këta dy edhe vetë Mulla Sula le ta thyej qafën dhe mos të na e thijë më me mulife të kota.

0 comments :

Post a Comment