Translate

Wednesday, March 23, 2016

ME SHKAS: TEZAT E MULLA SULËS SI PATARICA TË KALBURA

Ja tri tezat bajate të Mulla Sulës, përmes të cilave mundohet të mbahet si në pataricat e kalbura gjatë përpëlitjeve për të shkuar edhe paaaak më tutje: e para, politika të qëndrojë larg fesë, e dyta institucionet fetare, xhamitë, të mos merren me agjitacion e propagandë për asnjë politikë (shprehje kjo tipike komuniste) dhe, e treta, politikanët që bëjnë gafa të rënda fetare të amnistohen, sepse ata nuk janë ekspertë të fesë  

Shkruan Zeqie Veseli  
Gjatë emisionit televiziv “Programi 200”, të gazetarit të mirënjohur, Nazim Rashiti, e të emituar në televizionin kombëtar ALSAT M, në mesin e të ftuarve ishte edhe uzurpatori i postit të Reisul ulemasë së BFI-së, Sulejman Rexhepi, i cili, sa herë që flet, dëshmon se nuk është në tokë të bukës. Si asnjëherë më parë, njohësit e tij, njerëzit e afërt të tij, pas këtij emisioni pohuan se diçka nuk është në rregull me këtë njeri, thonë se diçka e madhe është duke e munduar. Dhe, ajo që po e mundon Mulla Sulën, më së miri u vërejt në këtë emision. Sa herë që i jepej fjala apo edhe që e merrte kot e kot, vërehej se vetes i kishte dhënë detyrë që t’i pështjellojë nja tri teza bajate por për Mulla Sulën mjaft domethënëse!
E para ishte, politika të qëndrojë larg fesë, e dyta ishte, institucionet fetare, në rastin e tij xhamitë, të mos merren me agjitacion e propagandë për asnjë politikë (shprehje kjo tipike komuniste) dhe, e treta, politikanët që bëjnë gafa të rënda fetare duhet të amnistohen, sepse ata nuk janë ekspertë të fesë. Pse Mulla Sula e sjell muhabetin rreth këtyre tezave? Ku gjuan ai, çfarë mesazhesh dëshiron të përcjellë përmes këtye tezave bajate. Ai, në fakt përcolli vetëm një mesazh: “punët i kam keq e më keq”! Mulla Sula nuk dëshiron që politika të merret me fe! Me këtë qëndrim ai në fakt dëshiron ta mjegullojë e ta mohojë një të vërtetë absolute, si Zoti që është Një! Nëse politika, sidomos politika shqiptare nuk do të merrej me fe, gjegjësisht me organizimin fetar islam në vend, Mulla Sula as që do të kishte shansin që të rikthehej në BFI e aq më pak ta uzurponte postin e Reisul ulemasë. Mulla Sula e ka peng të papërballueshëm faktin që, atë e riktheu në BFI pikërisht PDSH-ja, respektivisht, Refet Elmazi me urdhër të Menduh Thaçit. Këta dy aq shumë u lidhën sa Menduh Thaçi edhe vëllain e Mulla Sulës e nxori si kandidat i PDSH-së për kryetar të komunës së Sarajit. Menduh Thaçi, me kandidatin e tij për deputet në dysh, Komandant Agimin (Agim Krasniqin) ia pastruan terrenin dhe ia eliminuan të gjithë kërcënuesit nga oborri i BFI-së. Në momentin që po kulmonte kjo miqësi politiko-fetare, Mulla Sula do ta ndjejë rrezikun e kësaj përafërie të shëndoshë e të shëndetshme dhe, për ta nisur “pashallëkun e vet”, pikërisht në momentin kur po prishej koalicioni qeveritar i VMRO-PDSH-së, për shkak të tentativave për të zbatuar projekte antishqiptare, Mulla Sula do ta bekojë Nikolla Gruevskin me fjalët “E lus Allahun e Madhërishëm që ta bekoj kryeministrin e qeverisë së Maqedonisë, Nikolla Gruevski”! Mulla Sula e kuptoi fare mirë se të qenurit pranë politikës së Menduh Thaçit do ta ketë të pamundur vjedhjen, korrupsionin, nepotizmin dhe kriminalizimin e BFI-së. Dhe tani Mulla Sula kërkon që politika të qëndrojë larg fesë! Do me thënë që, institucionet politike të shtetit të mos merren fare me bashkësitë fetare edhe kur në këto bashkësi, siç është rasti në BFI, lulëzon kriminaliteti, korrupsioni, nepotizmi, shkelja e të drejtave të njeriut, hajnia, shkatërrimi.  Këtë hall ka Mulla Sula kur kërkon që politika të qëndrojë larg fesë, ndërsa, vetë ai, si fetar mund të zhytet thellë në ujërat e turbullta politike. Mulla Sula do të angazhohet për të penguar aktivitetet propagandistike politike nëpër xhami! Po pse tani e kërkon këtë gjë! Sepse, ç’ është e vërteta, nëpër disa xhami hoxhallarët haptazi thërrasin që të përkrahet BESA. Madje flitet se përmes një qarkore lëshuar deri te myftinitë, Mulla Sula është kërcënuar se do t’i largojë të gjithë ata hoxhallarë që do të propagojnë për BESËN! Po ky vetë që e ka gojën plotë me BDI? Po ky Mulla Sulë që shtron iftare të shtrenjta për udhëheqësit e BDI-së! Po ky Mulla Sula që krejt miqësinë e ngushtë e ka me funksionarë të BDI-së, sidomos me gjykatës e prokurorë të dështuar, me të cilët sikur më tepër e luan bisnesin se sa interesin fetar? Është shumë e qartë që Mulla Sula e ndërmerr këtë fushatë kundër BESËS nga frika se mund të “rrebelohen” këta të BDI-së dhe t’ia heqin pataricat që mezi e mbajnë “X faktorin” e Mulla Sulës. Mulla Sula është i vetmi “lider” fetar në rajon e më gjërë i cili me aq vullnet është marrur me politikë, i cili me aq transparencë ka involvuar politikën në BFI dhe, i cili, me aq lezet BFI-në e ka shndërruar në logjistikë të bisnesmenëve të BDI-së. Dhe, teza e tretë e çmendur e Mulla Sulës ishte amnestia tinzare e politikanëve që bëjnë gafa fetare! Në popull me të madhe po flitet se në mesin e „bombave” është edhe një bomë shumë e rëndë, një bombë e përmasave atomike, një bombë e cila, si e tillë, ka ditur të shkaktojë trazira e viktima pahesap në botë! Thuhet se në këtë bombë dëgjohet lideri i BDI-së, Ali Ahmeti se si e shanë Pejgamberin tonë, Muhamedin s.a.v.s. Sipas Mulla Sulës, ashtu siç mund të gabojë politikisht një hoxhë (siç ka gabuar me qindra herë vetë Mulla Sula) ashtu mund t’i lejohet një politikani që të gabojë fetarisht. Dredhija me firmë të Mulla Sulës! Të amnistohen të dy tipat e njerëzve që gabojnë, pavarësisht se ato gabime mund të jenë fatale për shoqërinë. Mulla Sula në fakt kërkon që të amnistohet nga politika për të gjitha ato krime, vjedhje e korrupsione që i ka bërë për këto vite në BFI. Dhe këtë amnisti e kërkon nga njeriu i cili ndonëse e shanë Muhamendin a.s. megjithatë amnistohet nga Mulla Sula! Nejse, njëri tjetrin mund ta amnistojnë por, a thua, a amniston kaq lehtë populli? Apo, Mulla Sula edhe më tej mendon se popullit edhe kashtë me i dhënë do të hajë, sepse, sipas tij, populli është bagëti! Gjithmonë ai që e kruan me popullin, i del gjak…/1klik/

0 comments :

Post a Comment