Translate

Thursday, January 21, 2016

OPINION: A ka besim gënjeshtari

Së shpejti, Sulejman Rexhepi as nuk do të mund të marrë dhurata por as nuk do të mund të japë dhurata. Ai do të japë llogari për gënjeshtrat e tij kundër drejtuesve të Nismës. E vërteta është vetëm një dhe, kjo e vërtetë do të dëshmojë se uzurpatori i postit të reisit gënjen. Gënjeshtër është posti i tij, gënjeshtër është “funksionimi” i tij, gënjeshtër është besimi i tij
 Shkruan: H. Ibrahim ef. Shabani
Shumë imamë, kolegë, dashamirë të lëvizjes opozitare brenda BFI-së, tashmë të njohur si Nisma për reforma në BFI, po shprehin habinë e tyre se si ende ka nga radhët e teologëve që i shërbejnë Sulejman Rexhepit, uzurpatorit të postit të Reisul Ulemasë. Nuk bëhet fjalë këtu se të njëjtit mund të shantazhohen nga uzurpatori, as që mund të kërcënohen por, thjesht, manipulohen nga “fuqia e pushtetit” të Sulejman Rexhepit të cilën ai e shterron nga përkujdesi i pushtetit për ta ruajtur nga ndonjë sulm eventual. Pushteti ia ka dhënë rojet ndërsa ky këtë përkujdesje e interpreton si fuqi të veten personale të gërshetuar me strukturat e caktuara të pushtetit me të cilat mund t’i shkatërrojë të gjithë ata që i dalin përpara. Kjo është e vërteta!
Nga ana tjetër, e vërtetë është edhe fakti që Sulejman Rexhepi, në një takim që e kemi pasur ne të Nismës me te në Myftininë e Shkupit, na është përulur deri në tokë që të heshtim dhe t’i nënshtrohemi, sepse vetëm me nënshtrimin tonë do të shkojnë punët mirë e mbarë. Natyrisht, ne nuk e kemi dashur këtë mirësi dhe mbarësi të Sulejman Rexhepit. I kemi thënë shkurt e shqip: jep dorëheqje se e more më qafë miletin! Pastaj na ka bërë truqe dhe na ka akuzuar si hajna dhe gënjeshtarë. Ja pra, nëse ne gënjejmë dhe vjedhim, atëherë nuk mund t’i nënshtrohemi dhe t’i shërbejmë Sulejman Rexhepit, nëse i nënshtrohemi atëherë nuk mund të gënjejmë. Çdo gjë që do të dilte nga BFI-ja do të dilte si e vërtetë e madhe e Sulejman Rexhepit! Zot na ruaj, këtij zullumi t’i shërbejmë ne? Me nënshtrimin tonë ta legjitimonim tërë atë veprim të trishtë të Sulejman Rexhepit?
Ne nuk u pajtuam me të dhe vendosëm që të vihemi në shërbim të të gjithë myslimanëve të vendit, duke ua thënë të vërtetën dhe vetëm të vërtetën rreth tërë asaj që po ndodhë në BFI dhe në organet e saj. Kjo e vërtetë do t’i dhemb shumë Sulejman Rexhepit, prandaj ai do të nis të shpif e të gënjejë për ne. Megjithatë, ne po ia hapim të gjitha shtigjet dhe po dëshirojmë ta nxjerrim në bregun e sigurtë ku do të jetë në gjendje ta thotë të paktën një të vërtetë. Urojmë që së shpejti të takohemi nëpër shumë procese gjyqësore në të cilat ai duhet ta thotë të paktën një të vërtetë. Ndonëse është fare e pabesueshme që ai të ketë guximin për ta shikuar në sy të vërtetën. Kësaj radhe nuk do të mund ta korruptojë ndonjë “gjykatës” me qingja e pula në villën e vet të ngritur në tokën e uzurpuar (dmth nuk është pronë e tij!) Sido qoftë, e vërteta atë do ta ndjek pas, tërë jetës, pavarësisht se a do të jetë “i gjithëpushtetshëm” apo i përgëdheluri i pushtetit. Ne do të përkujdesemi që e vërteta ta ndjek pas, në çdo skutë, në çdo kolltuk, në çdo ndeje e takim, duke ia zënë pritat gënjeshtrave të tij dhe duke e detyruar që të dorëzhet para të vërtetës. Sepse, siç transmetohet, Pejgamberi a.s. ka thënë: “Xhihadi më i mirë është ta thuash të dejtën përballë tiranit”! Ky është xhihadi më i mirë, më i sinqertë dhe më fisniku sepse, përcillet me sfida të paparashikueshme. Në xhihadin përballë armikut, secili mund të vdesë, apo, të paktën të shpresojë se do të ngadhnjejë. Ndërsa me xhihad para tiranit i ekspozohesh shkatërrimit, zhdukjes apo edhe likuidimit. Pranda, Pejgamberi  a.s. e ka quajtur “Xhihadi më i mirë”! Thënia e së drejtës, e së vërtetës përmes këtij xhihadi, është më i fuqishëm se çdo tiran, i cili nuk mund ta përligjë sepse tirani nuk e ka atë balansin shpirtëror për ta drejtuar popullatën duke ia thënë të vërtetën. Tek tirani “e vërteta” është vetëm ajo e cila del nga pushteti i tij i pakufijshëm, pra, ai gënjeshtrën e prezanton dhe e imponon si “të vërtetë” dhe urdhëron që kësaj t’i besohet. Kush nuk i beson ai largohet nga puna, nga fakulteti, nga medreseja…
Te Nisma për reforma në BFI ekziston një bindje e plotë se, duke e zhveshur Sulejman Rxhepin nga gënjeshtrat e tij, do ta detyrojmë që ta thotë një të vërtetë, natyrisht, duke e faktuar e jo duke e nxjerrë si fjalë goje sa për sy e faqe.
Së shpejti, Sulejman Rexhepi, uzurpatori i postit të Reisul Ulemasë së BFI-së, do të duhet të dalë para gjyqit dhe të dëshmojë me fakte se si, kur dhe ku u takua Myftiu i Myftinisë së Shkupit, Ibrahim Shabani, me liderin e PDSH-së, z. Menduh Thaçin, me të cilin paskan bërë plane për ta shkatërruar BFI-në? Ose do ta faktojë këtë të vërtetë (!) ose do ta thotë një të vërtetë: Kam gënjyer! Natyrisht që ka gënjyer dhe kësaj radhe nuk do të amnistohet aq lehtë nga gënjeshtrat që i ka sajuar për udhëheqësit e opozitës në kuadër të BFI-së që tashmë opinion i njeh si Nisma për reformat në BFI të RM-së. Nuk do të amnistohet, sado që përmes shkuesve të ndryshëm po lutet që të tërhiqet kjo padi.
Le t’ia përkujtojmë Sulejman Rexhepit këtu një të vërtetë historike të ndodhur në kohën e Ebu Hanifes prej të cilit halifja, Ebu Xhafer el-Mensuri, kërkon që të përkrahet në një mosmarrëveshje që e kishte me gruan e vet. Natyrisht, Ebu Hanifja ishte përcaktuar vetëm për të vëtetën dhe të drejtën dhe, kjo drejtësi, në këtë rast shkoi në të mirë të gruas. Halifja uli kokën duke u prekur shumë nga kjo mospërfillje e fuqisë së pushtetit të tij. Sapo iku Ebu Hanifja, gruaja pas shërbëtorit të vet i nisë flori, rrobe e gjësende me vlerë në shenjë falënderimi. Ebu Hanifja i refuzoi të gjitha ato shpërblime duke thënë “dhurata rrezikon besmin tim”!
Së shpejti, Sulejman Rexhepi as nuk do të mund të marrë dhurata por as nuk do të mund të japë dhurata. Ai do të japë llogari për gënjeshtrat e tij kundër drejtuesve të Nismës. E vërteta është vetëm një dhe, kjo e vërtetë do të dëshmojë se uzurpatori i postit të reisit gënjen. Gënjeshtër është posti i tij, gënjeshtër është “funksionimi” i tij, gënjeshtër është besimi i tij.
(Autori është drejtues i Nismës për reforma në BFI të RM-së)

0 comments :

Post a Comment