Analisti Semi Mehmeti në një deklaratë për “Lajm” nuk pret që BDI të ndërpresë projektin “Shkupi 2014”, sepse është i mendimit se ky projekt i reflekton ndjenjat kombëtare, fetare dhe kulturore të udhëheqësisë së BDI-së. “Ashtu siç ne shqiptarët respektojmë Skënderbeun e Adem Jasharin, ashtu edhe përfaqësuesit e BDI-së kanë të drejtë të respektojnë car Samuilin dhe Car Dushanin”, vlerëson Mehmeti
Nëse kryetari i BDI-së Ali Ahmeti e ka folur të vërtetën para shqiptarëve, kur thoshte në tubime partiake se BDI është partnere e barabartë e jo vetëm pjesëmarrëse në qeveri, atëherë dokumentet e zbuluara nga portali “Prizma” tregojnë involvimin më të drejtpërdrejtë të kësaj partie në ndërtimin e përmendoreve te projekti “Shkupi 2014”. Këto dokumente dëshmojnë se institucione qeveritare (ku BDI është partnere, e jo pjesëmarrëse), i kanë dhuruar pasuri shtetërore një shoqate, e cila më pas mjetet i dhuron për ndërtimin e përmendoreve në kuadër të projektit “Shkupi 2014”.
Shteti ka dhuruar një vetura “Audi A4” dhe hapësirë afariste në qendrën e Shkupit Shoqatës për bashkim shpirtëror të Setinces, Popadinces dhe Krushoradës nga Lerini, që paraqitet si donator i shtatë përmendoreve në qendër të Shkupit. Donacioni i fundit i kësaj shoqate për “fëmijët refugjatë nga Maqedonia e Egjeut”, u miratua në mbledhjen e djeshme të këshillit të qytetit të Shkupit, por nuk u bë e njohur se do të kushtojë përmendorja.
Sipas të dhënave të publikuara në “Gazetën Zyrtare”, kjo shoqate, e cila udhëhiqet nga 74 vjeçari Tashko Jovanov, përveç veturës Audi A4 dhe banesës 49 katrorëshe në rrugën “Veljko Vllahoviq”, nga SHA për Menaxhim me Hapësirë Banesore dhe Afariste, ka fituar edhe grante nga Qeveria për Shoqatat Joqeveritare.
Ahmeti dhe bdi-stat tjerë jo gjithmonë e flasin të vërtetën, gjë që u dëshmua edhe në zgjedhjet e prillit të vitittë kaluar, kur premtoi se kryetari i Kuvendit do të jetë shqiptarë, premtim që e harroi menjëherë sa mori ftesë për të qenë pjesë e qeverisë Gruevski. Mirëpo e pavërtetë e pamohueshme është se kjo parti është pjesëmarrëse në realizimin e projektit që dëmtoi aq shumë fytyrën e Shkupit.
Për këtë donacione ekzistojnë dokumente zyrtare, prandaj BDI-stat edhe nuk kanë fare hapësirë të thonë si zakonisht “ky informacion është nxjerrë nga konteksti”. Prandaj mund të kuptohet edhe heshtja e tyre dhe refuzimi për t’u përballë me media të pavarura në këtë temë.
Në opinion është mjaft e përhapur bindja se BDI-stat janë të kapur në afera të ndryshme, andaj edhe nuk mund të kundërshtojnë projektet më antishqiptare që zbatohen. Mirëpo me një qëndrim ndryshe del analisti Semi Mehmeti.
“Nuk duhet të habitemi nga sjellja e BDI-së lidhur me projektin Shkupi 2014. Mendoj se përmendoret e këtij projekti reflektojnë ndjenjat kombëtare, fetare, kulturore dhe shpirtërore të udhëheqësve të kësaj partie. Duke e ditur se sa azganë janë udhëheqësit e BDI-së, që kanë prishë edhe Jugosllavinë, nuk më besohet se ata do të lejonin që qeveria ku marrin pjesë të ndërtojë një projekt qindramilionësh, i cili është kundër ndjenjave të tyre.
Në këtë aspekt duhet të kemi mirëkuptim për ta, sepse ashtu siç ne shqiptarët respektojmë Skënderbeun e Adem Jasharin, ashtu edhe përfaqësuesit e BDI-së kanë të drejtë të respektojnë car Samuilin dhe Car Dushanin. Mirëpo nuk është në rregull që BDI-tat të bëjnë një gjë të tillë, duke gënjyer se janë patriotë shqiptarë”, vlerëson Mehmeti. Ai, si shumë analistë tjerë është i bindur se kundërshtimi deklarativ i projektit Shkupi 2014 nga ana e BDI-së është tallje dhe ofendim me shqiptarët. “Përkrahja më e madhe që BDI mund t’i japë këtij projekti është ta kundërshtojë atë deklarativisht. Në këtë mënyrë edhe siguron vota shqiptare për projektet e VMRO-së edhe mundëson realizimin konkret të projekteve kruciale që janë në interes të maqedonasve dhe të ortodoksëve, në dëm të kombeve dhe feve tjera në Maqedoni”, thotë Mehmeti. Si shembull për mishërimin e BDI-së me projektin “Shkupi 2014”, Mehmeti përmend edhe faktin se gjatë kohës sa është BDI-ja në pushtet, janë mbyllur disa media që kritikonin këtë projekt, kurse ndaj mediave tjera të pavarura shqiptare bëhet presion i hatashëm./lajmpress/
Comments
Post a Comment