Translate

Wednesday, April 22, 2015

Gazetarët vendosën kurora mortore para qeverisë

Gazetarë, aktivistë dhe politikanë dolën në protestë para Qeverisë duke vendosur kurora me lule, me mesazhin përmortor “Lamtumira e fundit”. Një kurorë e njëjtë, mbrëmë ishte vendosur para shtëpisë së gazetarit Borjan Jovanovskit, redaktor i portalit “Nova TV”. Tubimi i sotëm ishte në shenjë revolte kundër këtij akti.

“Thamë se kurorën do ta vendosim para Qeverisë, por kjo nuk do të thotë se ne mendojmë që Qeveria e ka porositur kurorën, por se Qeveria dhe institucionet kanë mundësuar një klimë në të cilin njerëz të caktuar marrin guximin dhe kërcënojnë jetën e gazetarëve dhe njerëzve që mendojnë ndryshe dhe shkruajnë në mënyrë kritike. Kemi situata ku në televizionet kombëtare, për një grup të madh gazetarësh, kërkohej eliminimi i tyre ndërsa prokurori publik nuk ka reaguar. Prokurorin publik e emëron Qeveria, prandaj kjo kurorë me mesazhin “Lamtumira e fundit” do të vendoset këtu, si paralajmërim se ndoshta nesër, vërtetë dikush mund të likuidohet dhe atë përgjegjësi duhet ta bartin këta njerëz këtu”, deklaroi Sashka Cvetkovska, gazetare e Nova TV.

Gazetarët kërkuan gjithashtu nga ministria e Brendshme që të gjendet përgjegjësi i këtij akti. 

“Kërkojmë mbrojtje policore për kolegun tonë Borjan Jovanovski dhe nëse kjo nuk bëhet do të konsiderojmë se ekziston pjesëmarrje direkte e njerëzve që e kanë kryer këtë krim, me pushtetin, përkatësisht Ministrinë e Brendshme. Gjatë gjithë viteve, të gjithë ne kemi pasur kërcënime të mëdha, por këtë kërcënim, menjëherë pas vdekjes së Nikolla Mlladenovit, e konsiderojmë si më të rrezikshëm, prandaj nuk duhet të qëndrohet duarkryq dhe heshtet për kërcënimin dhe incidentin e tillë”, tha Biljana Sekulovska, Nova TV.

Mbrëmë, një person i panjohur ka trokitur në shtëpinë e gazetarit, duke i dorëzuar gruas së tij, kurorën me mbishkrimin “Lamtumira e fundit” duke thënë se ajo është nga Todor Aleksandrov. Në shtëpi, në atë moment kanë qenë edhe fëmijët e mitur të Jovanovskit.

“Nga kërcënimet e shumta që ka marrë Borjani ose unë dhe kolegët e tjerë që guxojnë të shkruajnë tekste kritike për punën e Qeverisë, kjo na tronditi më së shumti. Na tronditi sepse në shtëpi ishin fëmijët e Borjanit, që janë vetëm 7 dhe 9 vjeç, dhe që nuk dinin si të reagonin. Ne as nuk dinim t’ua sqaronim atë që po ndodhte, por më së shumti u trondit vajza e madhe e Borjanit”, u shpreh Svetlana Jovanovska, motra e Borjan Jovanovskit.

Borjan Jovanovski dhe gazetarët që punojnë në portalin Nova TV, janë të njohur si kritikë të zëshëm të pushtetit aktual, me publikimin e shumë hulumtimeve për aferat e mundshme të korrupsionit për funksionarë të lartë qeveritarë. Kërcënimi ndaj Jovanovskit është dënuar edhe nga SHGM-ja e cila iu bëri thirrje autoriteteve të hetojnë urgjentisht rastin. 

“SHGM-ja dënon ashpër kërcënimin morbid për jetën e gazetarit Borjan Jovanovski dhe familjes së tij. Dërgimi i kurorës me lule, me mesazhin “Lamtumira e fundit” në shtëpinë e gazetarit Jovanovski, është akt qyqar kundër të gjithë gazetarëve në Maqedoni. Ne solidarizohemi me Jovanovskin, ndërsa autorëve të këtij kërcënimi u dërgojmë mesazhin se pavarësisht kërcënimeve të tilla, gazetarët nuk do të zmbrapsen nga misioni i tyre i informimit të opinionin për realitetin në Maqedoni”, thonë nga SHGM-ja.

Sot, kërcënime përmes Fejsbukut ka marrë edhe gazetari Zoran Bojarovski i cili e ka paraqitur rastin tashmë në polici./alsat/

0 comments :

Post a Comment