Brukseli konfirmon kërkesën e Prokurorisë për ekspertizë

Brukseli konfirmoi se ka marrë kërkesën e Prokurorit Publik të Maqedonisë për ekspertizë ndërkombëtare në procesimin e padive të ngritura nga palët, si atë për rastin Puçi nga pushteti, ashtu edhe për ato nga opozita, për përgjimet. Zëdhënësja e Komisionit Evropian Maja Koçijançiq megjithatë nuk dha përgjigje të prerë nëse BE-ja do të dërgojë ekspertë juridikë. Koçijançiq nga ana tjetër paralajmëroi iniciativën e deputetëve evropianë që të ndihmojnë në zgjidhjen e krizës politike në Maqedoni.

“Po, unë mund të konfirmoj se ne e kemi pranuar kërkesën e Prokurorit. Gjithashtu unë mund të them se e mirëpresim atë. Ju e dini se komisionari Han këtë e tha edhe në Parlamentin Evropian javën e kaluar, çdo iniciativë të marrë nga grupet e partive politike evropiane  dhe anëtarët individual të Parlamentit Evropian të ndihmojnë në kapërcimin e krizës dhe mirëpret dëshirën e tyre për t’u përfshirë më tej. Në këtë kontekst, dua të theksoj se takimi i parë mes palëve do të zhvillohet në fund të muajit dhe komisioni do të punojë nga afër me anëtarët e parlamentit evropian në këtë aspekt. Por folur në përgjithësi, partitë politike në IRJM duhet të shfaqin përgjegjësi dhe të përfshihen në dialog konstruktiv që ta kapërcejnë qorrsokakun dhe të fokusohen në prioritet strategjike për shtetin dhe qytetarët”, u shpreh Maja Kocijancic, zëdhënëse e Komisionit Evropian.

Ndërkohë, edhe ambasadorja e Francës në Maqedoni shprehu shqetësimin e thellë për mungesën e aktiviteteve për zgjidhjen e krizës politike, ndërkohë që tërhoqi vëmendjen se zgjatja e krizës mund të sjellë pasoja të rënda për vendin.

“Ne presim përfundimin e shpejtë të krizës dhe gjetjen e rrugëve dhe mënyrat për shtetin që të kthehet në situatën normale dhe në hapin normal. Rreziku afatgjatë është se kemi institucione që nuk funksionojnë prandaj duhet që kriza politike të zgjidhet. Ne jemi në mes të krizës politike sikurse qytetarët dhe po ndjekim me shqetësim zhvillimet. Ka krizë politike mes partive dhe prandaj është e rëndësishme që në këtë moment të kuptohet se kjo krizë mund të ketë pasoja negative në afat të gjatë dhe duhet të punojnë në përgjigje institucionale”, tha Laurence Auer, Ambasadorja e Francës në Shkup.

Brukseli dhe misionet e huaja në përgjithësi në vend, kanë shprehur shqetësimin për situatën e fundit. Komisioneri Han bëri të qartë se para se të dërgohet çdo ndihmë në Maqedoni, duhet të ofrohet garancia se klasa politike në vend do të zgjedh të ndjekë standardet evropiane. Pavarësisht krizës në rrafshin hetimor, ndërkombëtarët theksojnë se kriza është mbi të gjitha politike./lajm