Vatiç përforcimi i radhës dhe i fundit i Shkupit

Kampioni vjeshtor në Ligën së Dytë, FC Shkupi ka vazhduar me stërvitjet e rregullta në kuadër të përgatitjeve dimërore, por nga ana tjetër në skuadër ka ardhur dhe një përforcim tjetër. Së fundmi pjesë e bardhekaltërve është bërë Kenan Vatiç, i cili te Shkupi vjen nga skuadra e Metallurgut, teksa së fundmi ka luajtur si futbollist i huazuar te skuadra e Lokomotivës. 22 vjeçari që në moshën 17 vjeçare kishte kontratë profesionale me ekipin e Ligës së Parë Metallurgu, duke luajtur një kohë të gjatë me këtë skuadër edhe në rangun me të lartë, por që më pas të huazohet për në Ligën e Dytë. “Jam shumë i kënaqur që kam ardhur në një mes siç është ky te skuadra e Shkupit. Falënderoj të gjithë për pritjen që më kanë bërë dhe këtu vatër ndjehem si në familjen time. Kam ardhur në një ekip me të cilin do të shkruajmë historinë, klub i cili ka një të kaluar të lavdishme dhe një publikë të respektuar edhe jashtë Maqedonisë”, ka thënë Vatiç, i cili luan në pozitën mbrojtës i djathtë. Ndryshe, nga radhët e skuadrës nga Çairi thonë se me blerjen e Vatiç është mbyllur lista e përforcimeve. Në ndërkohë, skuadra e Shkupit ka vazhduar me stërvitje intensive dhe tani pas miqësores së parë që e fitoi ndaj Trepçës ’89 (1-0), ekipi po planifikon që të siguroj dhe kontrolluese të tjera. Kështu, sot (e shtunë) me fillim në ora 12 “pëllumbat” do të luajnë në Gjorçe Petrov kontrolluese me Makedonia Gj.P. ndërsa me 7 shkurt tani më është vendosur për kontrolluese kundër Vëllazërimit, ndeshje kjo që do të luhet në Strugë. Gjithashtu klubi është në bisedime që të aranzhojë edhe një miqësore me ekipin e Renovës, që deri më tani ende nuk është konfirmuar. Në ndërkohë, skuadra nga Çairi do të vazhdojë qëndrimin në Shkup deri me 3 shkurt, kur atë ditë do të nisen në Ohër, për të vazhduar përgatitjet për 10 ditë.