TIRANË – Është mbyllur procesi i votimit pothuajse në të gjithë territorin e Shqipërisë për zgjedhjet vendore në vend. Pas një procesi maratonë që ka filluar në orën 07:00 të mëngjesit të sotëm, procesi i votimit është mbyllur pas orarit zyrtar të parashikuar, raportojn mediat vendase.
Anëtarët e Komisionit të Qendrave të Votimit, sipas detyrimeve ligjore dorëzojnë kutitë e votimit dhe materialet e tjera zgjedhore pranë KZAZ-ve (Komisioni Zonal i Administrimit të Zgjedhjeve) për ti hapur më pas rrugë procesit të numërimit të votave.
Gjatë ditës së sotme në vend janë shfaqur disa problematika në disa qytete, kryesisht që lidhen me gabimet e shtypit në fletët e votimit, në nisjen me vonesë të procesit të votimit në disa qendra votimi, bllokimi i votimit në disa qendra votimi, etj
Ndërkohë pjesëmarrja në votime pritet të bëhet e ditur nga Komisioni Qendror i Zgjedhjeve, pasi të përpunohen të dhënat nga të gjitha qarqet e vendit, pasi aktualisht ka të dhëna vetëm për disa qendra votimi. Nga ana tjetër sipas të dhënave paraprake të dhëna nga KQZ pjesmarrja në votime është rreth 45 përqind.
Procesi i sotëm është ndjekur në terren nga disa diplomatë të lartë të akredituar në Shqipëri, ku kanë monitoruar nga afër procesin e votimit dhe pretendimet e forcave politika për problemet e shfaqura.
Një sërë organizatash dhe institucionesh të rëndësishme ndërkombëtare dhe vendore kanë monitoruar procesin e sotëm të votimit, si delegacioni i Bashkimit Evropian në Shqipëri, OSBE, disa organizata jo qeveritare, etj, të cilët do të paraqesin edhe raportet e tyre mbi procesin zgjedhor.
Sipas të dhënave zyrtare nga Komisioni Qendror i Zgjedhjeve Zyrtarisht në këtë zgjedhje garojnë 63 parti politike, ndërsa në garë janë gjithsej 157 kandidatë për 61 bashki. Janë regjistruar dy koalicione të mëdha, konkretisht Aleanca për Shqipërinë Europiane, që kryesohet nga Partia Socialiste e Shqipërisë, dhe që përbën bllokun e shumicës, por që ka tërhequr rreth vetes edhe parti të tjera jashtë koalicionit qeverisës. Nga ana tjetër, në spektrin opozitar është koalicioni i quajtur Aleanca Popullore për Punë dhe Dinjitet, i përbërë nga 15 parti politike. Ndërsa 11 parti konkurrojnë jashtë koalicioneve. Në disa bashki të vendit janë në garë edhe kandidatë të pavarur.
Comments
Post a Comment