Afera e përgjimit, SHBA: Ndalesa udhëtimi për zyrtarët?

Shtetet e Bashkuara mund të shfuqizojnë vizat apo të ndalojnë hyrjen në Amerikë, të politikanëve, gazetarëve, përfaqësuesve gjyqësor dhe afaristëve, njoftoi gazeta "Vest". Lista sipas gazetës është më e gjerë, pra i përfshin të gjithë zyrtarët të cilët janë të dyshuar për korrupsion, pastrim parash dhe shkelje të të drejtave të njeriut. Sipas informatave jozyrtare të këtij mediumi të shkruar, aktivizimi i masës do të varet drejtpërdrejt nga zhvillimi i krizës politike. 

“Një masë e këtillë do të mund të merret në rast se kriza politike në Maqedoni do të çonte drejt shkeljes dramatike të të drejtave të njeriut dhe të lirive themelore.Kjo masë nuk është e kufizuar vetëm për ndalim të hyrjes, por edhe ngrirjen e llogarive dhe ndalim të zotërimit të pronave që këta njerëz ndoshta i kanë në territorin e Shteteve të Bashkuara”.  

Alsat M kërkoi qëndrim edhe nga Ambasada e SHBA-ve. Në përgjigjen e tyre thuhet

“Janë hapur çështje serioze, parasëgjithash përgjegjësia është e qytetarëve dhe Institucioneve që ti zgjidhin në mënyrë transparente dhe me sundimin e ligjit. Ka faktorë të ndryshëm që mund të pengojnë për dhënien e vizave për SHBA ose shfuqizimin e tyre. Këto faktorë janë informata publike’, thuhet në përgjigjen e ambasadës së SHBA-ve. 

Sipas gazetës, në Maqedoni edhe deri tani ka pasur dhe ka shembuj të zyrtarëve të lartë të cilët janë privuar nga e drejta për të udhëtuar dhe për të pasur në dispozicion prona dhe llogari bankare në Shtetet e Bashkuara. Kujtojmë rastin e ish kryeministrit Ljubço Georgievski, të cilit i është revokuar viza amerikane në vitin 2006 që pastaj në vitin 2011 ti kthehet. /Alsat-M