Nuk legjitimohet rezili
Të dashur kolegë, mu imponua një komunikim shumë i pazakonshëm me ju. Pse po ju drejtohem? Sepse, ju, me votën tuaj, në një mbledhje jolegjitime, para një organi inekzistent, para kuorumit të mangët, vendosët për pozitën time. Mbi të gjitha vendosët për nderin tim, për fytyrën time! Me këtë rast, për fatin e keq të juajin, ia dhatë krahun matrapazit, njeriut më të rrezikshëm të mbarë shqiptarisë dhe shoqërisë sonë. A e njihni ju Sulejman Rexhepin! Mos e bête ju Reisul Ulema atë, a? A mos i uzurpuat ju zyret e BFI, a mos fjetët ju me netë të tëra aty, derisa nuk erdhi Sulejman Rexhepi dhe u ul në atë post! Ju nuk dini asgjë. Ose, dini gjithçka dhe e keni qejf ta përkrani rezilin. Ju bëheni se kinse nuk dini rreth Sulejman Rexhepit. Ju dini gjithçka! I kemi diskutuar me mijëra here manipulimet e tij, mallverzimet e tij, vjedhjet e tij, poshtërimin e tij që na i bën ne dhe shoqërisë sonë. Hë, thuani se nuk është e vërtetë.
Nëse nuk dini ju, unë për vete di gjithçka dhe, për ato nëna e gra që janë share nga ana e Sulejman Rexhepit (pra edhe për nënat dhe gratë e juaja) kam vendosur që mos të hesht! Do të shihemi edhe nëpër gjyqe. Do të zbardhen shumë çështje të trishtueshme. Dikush do të përfundojë në burg! Atëherë ku do të ngelë ndershmëria juaj, ku do të ngelë fytyra juaj, ku do të ngelë kolegialiteti i juaj, ku do të ngelë për kushtimi i juaj për t’i shërbyer me devotshmëri islamit. Do t’ju mbulojë turpi. Më vjen keq për kolegun tim, për villain tim myfti i posaemëruar në Myftininë e Tetovës, sepse vetëm ai mund të “amnistohet” nga votimi i tij, edhe pse edhe ai duhet të kuptojë se është njeri akademik dhe se nuk guxon që të pranojë të diskutohet për dike në mungesë të tij. Kjo nuk është as etike dhe as islame. Me çështje joislame merret vetëm Sulejman Rexhepi dhe njerëzit e tij. A mos isha unë në atë tryezë ku ju diskutuat për mua dhe ma pretë petkun e ardhmërisë sime?
Mos pranoni që edhe ju të më bëheni lëndë për t’ju paditur. Sepse, në fund, dijeni, do të kërkoje dhe nga ju llogari para organeve të drejtësisë se pse i keni dhënë përkrahje një njeriu të cilin e keni njohur se është urithi më i madh i të gjitha kohërave të islamit në Maqedoni.
Të dashur kolegë, myftinj të BFI si dhe ju koordinatorë! Me lojalitetin tuaj, apo me servilizmin tuaj, mos mendoni se po ia siguroni legjitimitetin Sulejman Rexhepit, sepse, ai hala është ilegjitim. Ai duhet të zgjidhet me procedure të rregullt. Procedurë të rregullt nuk ka pa rregullore të re për zgjedhje. Dhe ju, duke i tejkaluar të gjitha procedurat u ngutët ta legjitimoni Sulejman Rexhepin, sepse atij i duhej kjo për ta çuar deri në fund projektin e vjedhjes dhe të uzurpimit. Pse bëheni edhe ju bashkëvjedhës me të ? Pse edhe ju bëheni bashkësharës të nënave dhe të grave të hoxhallarëve? I paska mbetur hatri Sulejman Rexhepit se pse nuk ia paskemi pas përshëndetë dy bashkëpunëtorët e tij : ish-myftiun e Tetovës dhe Kryetarin e Kuvendit të BFI ? Po krejt dynjaja e di se çka ka bërë ky Sulejman Rexhep duke i luftuar pikërisht ata dy « bashkëpunëtorë » që nuk i paskemi përshëndetë ne. Ua ka nxirë jetën, i ka shpallë tradhëtarë, miq të murtedit, ua ka sharë nënat e gratë, çka jo tjetër. Unë, në këtë drejtim, të paktën karshi atyre jam shumë i pastër, nuk kam më të voglin mëkat ndaj tyre, në këtë dynja dhe në ahiret. Dhe ju e përkrahni këtë rezil se pse unë nuk ia paskam përshëndetë armiqtë! Ju mendoni se Sulejman Rexhepi ka miq?
Kujdes, miq të dashur, kolegë të nderuar. Ju keni sjellë një vendim të cilin duhet ta zbatoni ! Vendimi i juaj është për ta mbuluar trishtimin, vjedhjen, punët e nëndheshme, skenaret antimuslimane, pasurimin mbi kurriz të muslimanëve fukaratë e vendit, për ta shpëtuar « babain » e juaj nga përgjegjësia morale e penale, ndërsa unë kam zgjedhur ta përkrah vendimin tim : deri në frymën time të fundit ta luftoj këtë të keqe dhe t’ua mbrojë edhe ju moralin e ndershmërinë. Ata që kanë bashkëpunu dhe që do të bashkëpunojnë me Sulejman Rexhepin, do të detyrohen që nëpër procedura gjyqësore t’i bëhen dëshmitarë. Le të shtrëngohen mirë. Nuk përfundon me kaq! Veprimet e cubëve ka kohë që janë zëvendësuar me veprime të burrërisë. Dikush ka kërkuar mejdan. Do ta ketë. Ju kujdes se ku do ta keni vendin tuaj.
Me shumë selam,
Kryeatar i Këshillit të Përkohshëm i BFI-së
h. Ibrahim ef. Shabani
Comments
Post a Comment