LSDM-ja ka dorëzuar deri tani 29 padi penale kundër 24 personave, shumica e të cilëve, bartës të funksioneve përgjegjëse publike. Kjo është statistika totale e numrit të lëndëve të paraqitura në prokurorinë publike nga "bombat" e opozitës. Por, pavarësisht numrit të madh të denoncimeve për vepra të rënda penale, nga përgjimi i paautorizuar deri te ryshfeti dhe korrupsioni, zëdhënësi i partisë Shilegov ka një përshtypje të fortë se denoncimet e opozitës nuk kanë të njëjtin trajtim si ato që MPB-ja ka ngritur kundër LSDM-së. Sipas Shilegovit, rasti "Puçi" në të cilin dyshohet lideri i LSDM-së ZoranZaev, ishte dorëzuar vetëm 10 ditë para hedhjes së bombëssë tyre të parë.Deri më sot, për “Puçin” edhe kryeministri dha deklaratë, ndërkohë që për 29 denoncimet të opozitës, dihet vetëm fakti që ato iu janë ndarë prokurorëve për t’u hetuar.
“Dy lëndët që janë dorëzuar kundër LSDM-së, jo që kanë dinamikë të caktuar, por shkojnë me shpejtësi të dritës përpara. Nga ana tjetër, kallëzimi i parë penal nga ana e LSDM-së është dorëzuar më 10 shkurt dhe është kundër SashoMijalkovit, GoranGruevskit drejtor i Drejtorisë së pestë në MPB-së, një udhëheqësi dhe personave të panjohur. Deri më sot, pas dy muajve ne si denoncues nuk kemi informacione se si rrjedhin veprimet operative dhe hetuese që ka ndërmarrë prokuroria publike”, tha Petre Shilegov, zëdhënës i LSDM-së.
Alsat M dërgoi disa pyetje te Prokuroria Publike për të gjitha rastet lidhur me përgjimin. Për rastin “Puçi”, na u përgjigjën se hetimi po vazhdon por nuk mund të jepen detaje.
“Prokuroria themelore publike e Shkupit, pas kallëzimeve penale të dorëzuara nga LSDM-ja, siç edhe ka njoftuar, punon në mënyrë aktive për to. Një pjesë e denoncuesve të kallëzimeve penale janë dëgjuar para Prokurorit Publik, ndërsa në vijim është marrja e veprimeve të tjera me qëllim që të grumbullohen njoftime dhe dëshmi relevante për vendimmarrje mbi kallëzimet penale. Për numrin dhe personat për të cilët janë dorëzuar kallëzime, si dhe sa persona janë paraqitur para Prokurorit Publik, për momentin nuk mund t’i ndajmë ato informacione”.
Nga Prokuroria Publike shtuan se pas kallëzimeve penale të dorëzuara nga LSDM-ja janë aktivizuar 21 prokurorë publikë. Dallimi nga njoftimi i fundit për median, i zyrës së Marko Zvërlevskit, ishte se në atë kohë, kallëzimet po shqyrtoheshin nga 17 prokurorë publikë, pra 4 më pak se tani. Alsat M
Comments
Post a Comment