Nga kabineti i kancelares Merkel, deklaruan për “Lajm”, se takimet për javën e ardhshme do të prezantohen ditën e premte (nesër)
Shkup/Berlin, 16 prill - Nuk ka konfirmim zyrtar se do të realizohet takimi i shumë përfolur me kryeministres gjermane Angela Merkel dhe kryeministrit maqedonas, Nikolla Gruevski, kanë konfirmuar për “Lajm” nga kabineti i kancelares gjermane dhe nga selia e partisë së saj në Berlin. Kjo është përgjigje e spekulimeve se Gruevski dhe Merkel mund të takohen javën e ardhshme, në lidhje me krizën aktuale politike në Maqedoni.
Nga kabineti i kancelares Merkel, deklaruan për “Lajm”, se takimet për javën e ardhshme do të prezantohen ditën e premte.
“Ju falënderojmë për pyetjen tuaj, mirëpo takimet e kancelares për javën e ardhshme zakonisht paralajmërohen nga zëdhënësi i saj në preskonferencën qeveritare të ditës së premte. Për këtë arsye, tani nuk mund të prononcohemi për takimet gjatë javës së ardhshme”, thanë për “Lajm” nga press-shërbimi i kabinetit të kancelares gjermane Merkel.
Edhe përkundër tentimeve të bëra, nuk arritëm të sigurojmë qëndrim lidhur me këtë takim të përfolur nga zëdhënësit e qeverisë së Maqedonisë Aleksandar Gjeorgjiev dhe Muhamet Hoxha. Jozyrtarisht marrim vesh se në Qeveri ende shpresojnë se mund të realizohet ky takim.
Spekulimet për takim të mundshëm pranveror Gruevski-Merkel u paraqitën për herë të parë kur kryeministri grek Aleksis Cipras më 23 mars realizoi takim zyrtar me Angela Merkel në Berlin, por u përsëritën edhe më vonë për shkak se partia CDU e kancelares Merkel dhe VMRO-DPMNE e kryeministrit Gruevski, i takojnë familjes së partive popullore evropiane.
Mosrealizimi eventual i këtij takimi, do të jetë edhe një dështim për politikën e jashtme maqedonase, pasi kohë më parë presidenti i Komisionit Evropian, Zhan Klod Junker, anuloi takimin me Gruevskin, me arsyetim se një takim i tillë do të ishte “oportunist” në këtë moment.
Dështimi njëkohësisht do të ishte edhe një shuplakë e re për qeverinë e Maqedonisë në këtë kohë të krizës politike edhe atë jo vetëm nga Komisioni Evropian, por edhe nga partitë popullore evropiane, ku VMRO-DPMNE ka statusin e anëtares shoqëruese.
Partitë europiane popullore për momentin kanë 11, nga gjithsej 28 anëtarë në Komisionin Evropian. (i.s.)
Comments
Post a Comment