Presidentja e Republikës së Kosovës, Atifete Jahjaga, bëri homazhe në Prekaz pranë varrezave të familjes Jashari. Ditën e sotme ajo e quajti të veçantë për të nderuar figurën e komandantit legjendar Adem Jashari.
“Kemi ardhur sot në këtë ditë të veçantë, për të nderuar figurën dhe emblemën e UÇK-së, komandantit legjendar Adem Jashari, për të kujtuar sakrificën individuale dhe kolektive të të gjithë atyre që ranë për ne që sot të jemi të lirë, një vend i pavarur, një vend sovranë dhe një vend i cili ka të ardhme të sigurt drejtë integrimeve evropiane dhe euro-atlantike dhe miqësi të përjetshme me Shtetet e Bashkuara të Amerikës”, ka thënë Jahjaga.
Ndërkaq kryeministri i Kosovës, Isa Mustafa, ka thënë se Republika e Kosovës sot shënon një datë të veçantë të historisë së saj.
Po ashtu ka shtuar ai sot përulemi me nderim para kujtimit për komandantin legjendar Adem Jashari si dhe të gjithë bashkëfamiljarët e tij.
“Flaka që u ndez në kullën e Jasharajve i bashkoi të gjithë shqiptarët kudo që ishin. Shqiptarët nga të gjitha kontinentet ishin ushtarë të Kosovës dhe gjithkush që merrte frymë me këtë bindje e ndihmoi luftën e Ushtrisë Çlirimtare të Kosovës”, ka thënë Mustafa.
Sipas tij, nga Prekazi nisi një fazë e re drejt fillimit të shtetndërtimit.
“Sot kujtojmë edhe shumë data tjera, demonstratat e vitit 1968, 1981, grevat e minatorëve, Ibrahim Rugovën...”, ka thënë ndër tjerash kryeministri Mustafa.
Ai gjithashtu ka përmendur edhe rolin e aleatëve të Kosovës duke shprehur mirënjohjen më të thellë për aleatët tanë që në ditët më vështira i dolën në krah dhe bashkërisht u vulos çlirimi i Kosovës.
Comments
Post a Comment