Translate

Tuesday, March 17, 2015

Jusuf Zimeri akuzon kreun e BFIM-së

Gazeta Lajm/ Më shkarkuan pa më konsultuar dhe në kundërshtim me Kushtetutën e Bashkësisë Fetare Islame të Maqedonisë (BFIM). Me këto fjalë nis rrëfimin e tij Jusuf Zimeri i cili deri më 20 shkurt të këtij viti ishte drejtor në Sektorin për vakëfet e BFIM-së në nivel republikan. Ai thotë se edhe sot e kësaj dite nuk i din arsyet e shkarkimit të tij nga detyra. “Vendimin për shkarkimin ma sollën në zyrë. Në vendimin për shkarkim nga puna s’ka asnjë arsye pse shkarkohem. Përveç asaj ku arsyetohet kthimi im në Medresenë ‘Isa Beu’ në Shkup, ku isha 6 vjet sekretar i Medresesë”, thotë për “Lajm” Zimeri. Ai thotë se është shkarkuar nga vetë Reisi, gjegjësisht kryetari i BFIM-së Sulejman Rexhepi, në vend që kjo të bëhet nga Rijaseti. “Shkarkimi im është bërë pa asnjë njoftim dhe konsultim paraprak. Vendimi për shkarkimin më erdhi befasisht, duke punuar. Çështja tjetër është se në vendim kam pasur të drejtë ankese 8 ditë. Unë s’e kam shfrytëzuar të drejtën e ankesës meqë vendimi ka qenë në kundërshtim me Kushtetutën e BFIM-së”, sqaron Zimeri. Ai thotë se në këtë afat kohor prej tetë ditësh ka bërë kërkesë sqarimi se si erdhi puna deri te shkarkimi pa konsultim paraprak, por një gjë e tillë nuk i është shpjeguar nga ky institucion. “Edhe sot e kësaj dite nuk e di pse jam shkarkuar nga puna sepse nuk më është dhënë asnjë lloj sqarimi”, thekson më tej Zimeri. Në BFIM nuk arritëm të marrim prononcim lidhur me shkarkimin e tij. Përndryshe, Jusuf Zimeri ka qenë drejtor i Sektorit për vakëfet në BFIM prej tetorit të vitit 2006 deri në shkurt të vititi 2009 kur edhe është shkarkuar nga pozita e drejtorit të vakëfit.

( Botuar në gazetën ditore LAJM në vitin 2009)

linku: http://www.studentet.info/modules/ipboard/index.php?showtopic=17632

0 comments :

Post a Comment