Translate

Tuesday, March 24, 2015

Formohet Plenumi i gazetarëve: Nuk pajtohem me ata kolegë që nuk respektojnë parimet gazetareske

Edhe gazetarët kanë formuar tashmë plenumin e tyre. Në njoftimin e firmosur nga dhjetëra gazetarë eminent në vend, thuhet se keqpërdorimi i mediave sidomos gjatë kësaj krize politike, fshehja e fakteve nga opinioni publik dhe mos-informimi i drejtë i ka detyruar që të formojnë këtë plenum.
“Të ballafaquar me situatën e ndërlikuar në vend, ku informimi i opinionit luan rol të madh, ndjejmë nevojën që të mos rijmë anash nga ndodhitë dhe ta theksojmë përgjegjësinë në kryerjen e profesionit gazetaresk. Aktualisht, me ndërhyrjen në profesion dhe keqpërdorimin e parimeve gazetareske po ndodh “krim në terminet qendrore”. Opinioni aspak nuk është i informuar për ndodhi të rëndësishme nga jeta politike dhe shoqërore, dezinformohet dhe manipulohet”, thonë nga Plenumi i Gazetarëve
Plenumi i gazetarëve i është bashkëngjitur protestës së mbrëmshme përpara RTVM-së, për tu distancuar nga, siç thonë ata, shkelja e parimeve gazetareske nga kolegët gazetarë dhe redaktorë që punojnë në televizionin shtetëror. 
“Ne të gjithë e dimë se kolegët tanë këtu lartë në këtë ndërtesë i dinë parimet e punës profesionale, sepse ne kemi qenë redaktorët e tyre. Ua kemi përcjellë atë që e punojmë ne. Nuk do të hyjmë në atë se për çfarë arsye ata i tradhtojnë këto parime, thjesht mobilizohemi që të themi qëndrimin tonë se distancohemi dhe nuk pajtohemi me ato kolegë që nuk i respektojnë parimet gazetareske, por thjesht kanë hyrë në rrotën e makinerisë propagandistike”, deklaroi Ida Protugjer, gazetare.
“Goran Petrevski e di shumë mirë se porositë i bën Martin Protugjeri. Ai është përmbarues i Martin Protugjerit dhe Nikolla Gruevskit. Kur tashmë e kanë shitur profesionin, kolegia tha nuk i di arsyet, unë mendoj se i di arsyet, ato janë materiale dhe asgjë tjetër. Unë ju them, nuk ka amnisti për ta në profesion pas kësaj”, tha Aco Kabranov, gazetar.
Lideri i Dinjetetit Stojançe Angellov vazhdon që për çdo ditë, në prag të ditarit qendror të lajmeve në TVM, të protestojë para ndërtesës së televizionit, duke kërkuar publikimin e bombave të LSDM-së. Angellov tentoi edhe hyrjen në ndërtesën e RTVM-së të shtunën e kaluar, kur gratë pjesëmarrëse në protestë tentuan ti tejkalojnë barrikadat duke përqafuar policët. Kryetari i Dinjitetit paralajmëroi protestë tjetër masive të shtunën e ardhshme dhe tjetër tentim pa dhunë për të hyrë në MRTV. /AlsatM

0 comments :

Post a Comment