Translate

Monday, March 23, 2015

‘Bomba e XIII’, Zaevi kërkon dorëheqjen e Gruevskit

Lideri i LSDM-së Zoran Zaev theksoi se kryeministri Nikolla Gruevski me ose pa vetëdije, po dërgon sinjale destabilizimi përmes paraqitjeve të tij kërcënuese nëpër Maqedoni. Megjithatë, sipas Zaevit, Gruevskit tashmë nuk e ka fuqinë që të krijojë kriza të mëdha sepse, siç thotë ai, jo gjithçka varet tashmë nga vullneti i Gruevskit. Nuk do të mund të keqpërdoren as marrëdhëniet ndëretnike, sepse sipas opozitës, bashkësitë kombëtare tani janë më të bashkuara se kurrë, kundër këtij regjimi.

“Gruevski, me këto kërcënime që imponon, aktualisht për të shpëtuar lëkurën e vet, dërgon mesazhin për destabilizim. I vetëdijshëm ose jo, opinioni le të komentojë. Ne luftojmë me fjalë dhe me këto dëshmi, ai lufton me të gjitha instrumentet dhe institucionet që ka në dispozicion dhe kërcënon familje që nuk janë pjesë e kryesisë së LSDM-së, dërgon kërcënime të drejtpërdrejta. Edhe sikur të dojë Gruevski, qoftë edhe nënvetëdijshëm të destabilizojë situatën, si asnjëherë më parë bashkësitë etnike janë të bashkuara në të vetmin qëllim: kthimin e lirisë dhe demokracisë. Së dyti, asnjë nuk varët tashmë vetëm nga ai”, deklaroi Zoran Zaev, kryetar i LSDM-së.

Zaevi i bëri thirrje Gruevskit që të heq dorë nga torturimi i mëtejshëm i bashkëpunëtorëve të tij dhe gjithë qytetarëve të vendit. Ai kërkoi dorëheqjen e Qeverisë aktuale dhe largimin e Gruevskit nga politika. 

“Mbaroi, Nikolla Gruevski! Mos e torturo më tepër Maqedoninë. Jep dorëheqjen dhe lejoji bashkëpunëtorët të bëjnë të njëjtën gjë. Vijojnë dëshmi të reja për shumë çështje të paligjshme dhe kriminale. Nuk ka fund për lojërat e pandershme dhe të pista. Bisedat e deritanishme telefonike dhe ato që pasojnë në periudhën e ardhshme, janë arsye e forte jo vetëm për dorëheqje por edhe për largimin e Gruevskit dhe rrethit të ngushtë të tij nga skena politike. Janë shkruar faqet më të shëmtuara të historisë së Maqedonisë. Nuk do të lejojmë të shkruhen faqe të reja të shëmtuara”, tha Zoran Zaev, kryetar i LSDM-së.

I pyetur për rastet që priten me interes të veçantë nga qytetarët shqiptarë, Zaevi theksoi se e vërteta për çështje të caktuara mund të mos përputhet me pritjet e opinionit. Sidoqoftë, ai u zotua se do të publikojë gjithçka që posedon.

“Për disa nga çështjet që do të publikojmë, grupe të caktuara qytetare dhe politike kanë pritje të ndryshme nga ajo çfarë qëndron në të vërtetë. Por ne do ta publikojmë të vërtetën, në mënyrë autentike, me biseda nga fillimi deri në fund për çfarëdo qoftë, pavarësisht, nëse bëhet fjalë për çështje që prekin politikanë shqiptarë apo maqedonas”, u shpreh Zoran Zaev, kryetar i LSDM-së.

Zaevi u bëri thirrje edhe partive shqiptare që t’i bashkëngjiten projektit për zbardhjen e së vërtetës për Maqedoninë. Ai tha se është e rëndësishme që të gjitha forcat demokratike t’i bashkëngjiten tani procesit, pasi kur të bëhet e qartë rënia e Gruevskit, do të ketë shumë komandantë të paslufte. Benjamin Arifi/alsat-m

0 comments :

Post a Comment